„Живееме во време на преиспитување, кога сигурноста не се подразбира, а економијата и енергетиката се прашање на опстанок“, порача премиерот Христијан Мицкоски од Виена, каде што оствари низа средби со цел продлабочување на економската соработка. Во своето обраќање, тој упати јасна порака дека Владата е насочена кон создавање економија што произведува вредност, а не само троши.
Премиерот истакна дека инвестициите се двигател на промените кои носат нова индустрија, знаење и квалитет, при што Австрија ја издвои како еден од најважните партнери во таа визија.
„Не сакаме само да ја одржуваме соработката. Сакаме да ја подигнеме на повисоко ниво. Новото време бара нова динамика – повеќе инвестиции во производство, енергетика и дигитална трансформација“, потенцираше Мицкоски.
Осврнувајќи се на европската перспектива, премиерот нагласи дека енергетската транзиција е тест на лидерство, кој за Македонија претставува шанса за економско јакнење. Според него, Европа мора да дејствува одлучно, бидејќи стабилноста на целиот континент зависи од економската сила на сите негови делови.
„Европа не смее да биде само идеја, Европа мора да биде резултат“, заклучи Мицкоски, порачувајќи дека македонската Влада е подготвена да преземе одговорност и да испорача конкретни резултати во партнерство со европските пријатели.