Премиерот Христијан Мицкоски во рамки на посетата на Вашингтон се обрати пред Атлантскиот совет, каде ги претстави приоритетите на Владата, стратешкото партнерство со САД, европската интеграција и плановите за економски развој на државата.
Мицкоски оцени дека партнерството со Соединетите Американски Држави се гради со децении и порача дека Владата има намера дополнително да го продлабочува. Според него, географската положба на Македонија ѝ дава важна улога во регионалното транспортно и енергетско поврзување.
Во делот на обврските кон НАТО, премиерот посочи дека државата планира постепено зголемување на издвојувањата за одбраната, паралелно со инвестиции во патната, железничката и енергетската инфраструктура.
Како еден од приоритетите ја издвои и сајбер-безбедноста. Тој најави развој на примарен дата-центар кој би ги поврзал јавните институции, со дополнителна заштита преку секундарен центар за обновување на податоци и клауд инфраструктура.
Мицкоски пред Атлантскиот совет ја претстави и развојната стратегија на Владата, која, како што посочи, се потпира на инфраструктурата, енергетиката и развојот на вештачката интелигенција и високите технологии.
Во енергетскиот сектор, тој ги посочи интерконекторите со Грција и Србија, нагласувајќи дека нивната изградба може да ја зајакне улогата на Македонија во регионалното снабдување со природен гас и енергетското поврзување со Централна Европа.
Тој се осврна и на Коридорите 8 и 10, кои, според него, имаат економско, стратешко и безбедносно значење. Во тој контекст ја истакна и нивната потенцијална улога во идната реконструкција на Украина.
Говорејќи за европската интеграција, Мицкоски порача дека Македонија останува посветена на членството во Европската Унија, но побара процесот да биде заснован на реформи и заслуги и да биде предвидлив.
Премиерот истакна дека земјата, паралелно со разговорите за европската перспектива, ќе продолжи со економскиот развој, реформите, инвестициите и јакнењето на владеењето на правото.
Во обраќањето го посочи и економскиот раст од 4,3 проценти во вториот квартал, оценувајќи дека земјата е меѓу европските држави со највисок раст во тој период.
Мицкоски порача дека Владата ќе продолжи со разговорите со европските партнери и САД, а како стратешки приоритети ги издвои продлабочувањето на сојузништвото со Вашингтон и полноправното членство во Европската Унија.