Претседателот на Владата, Христијан Мицкоски, при посетата на Гевгелија истакна дека реконструкцијата на старата чаршија е уште еден реализиран проект и најави продолжување на поддршката за сите општини во државата.
Мицкоски посочи дека Владата останува посветена на поддршката на локалната самоуправа без разлика на партиската припадност.
„Добар ден од мене, Немам јас што да додадам на тоа што е веќе кажано од претходните говорници, можам само да посакам уште многу вакви проекти во периодот којшто следи да реализираме. Убеден сум дека ќе ги реализираме бидејќи овде во Гевгелија, како впрочем и низ цела Македонија имаме амбициозна локална самоуправа без разлика на партиската припадност, ние како Влада ги поддржуваме општините насекаде, низ цела држава“, рече премиерот.
Тој изнесе податоци за досегашните финансиски вложувања на Владата во капитални инвестиции на општинско ниво.
„До сега имаме издвоено како Влада некаде околу половина милијарда евра за проекти, повеќе од 1.200 проекти што се завршени, што се завршуваат, што се отпочнуваат, уште мал дел и ќе се завршат. Така што очекувам еве до крајот на годината овој проект да биде завршен од децентрализираните средства, од централниот буџет кон општините и веќе во следната година да размислуваме за нови средства коишто ќе ги одвоиме за општините, за реализирање на капитални инвестиции коишто имаат за цел да го подобрат квалитетот на животот на граѓаните“, соопшти Мицкоски.
Премиерот упати благодарност и честитки до локалното раководство и сите институции вклучени во реализацијата на овој зафат.
„Ја користам оваа прилика да му честитам на градоначалникот за инспиративната работа којашто ја врши како градоначалник, да се заблагодарам на советниците во Советот коишто ја поддржуваат неговата работа, на администрацијата без којашто овие проекти би биле невозможни да се решат, на пратеничката којашто доаѓа од Гевгелија којашто се бори за проект повеќе за Гевгелија и се разбира и за овој дел од Македонија, на колегите од Владата, на министерот за култура и туризам, на потпретседателот на Влада и министер за транспорт, на поранешниот министер за култура и туризам сега национален координатор, на сите институции коишто учествуваа во реализацијата на овој проект и на овие проекти бидејќи без тимска работа реализирањето на вакви проекти е невозможно. Така што уште еднаш нека ни е со среќа и нека ни се множат вакви проекти“, заклучи Мицкоски.
