Премиерот Христијан Мицкоски, во интервју за Атлантскиот совет за време на посетата на САД, истакна дека земјата ги исполнува своите ветувања и има јасен план, при што нагласи дека до 2035 година се планира достигнување на 3,5 отсто за воени расходи и 1,5 проценти инвестиции во стратешка инфраструктура.
Мицкоски оцени дека државата е во многу подобра форма отколку пред три години и изрази уверен став дека за три години позицијата ќе биде уште подобра. Тој се осврна и на соработката со САД, нагласувајќи дека станува збор за децениско стратешко партнерство.
„Нашето стратешко партнерство со САД не дојде одненадеж. Тоа е децениски старо стратешко партнерство и продолжување на таа траекторија. Ние веруваме дека нашиот најсилен сојузник се Соединетите Американски Држави. Веруваме и јас и нашата Влада дека ги делиме истите вредности, а во животот, кога избирате партнер, избирате партнер. Играњето двојни игри или имањето двојни стандарди не е нешто што е посакувано за мене лично, ниту за мојата Влада. Затоа, стоењето рамо до рамо со стратешките партнери — избрани еднаш – треба да трае засекогаш. Ако го менуваме нашето мислење во зависност од дневната политика, тогаш никој нема да ви верува и никој нема да има доверба во веќе идното партнерство. Ние можеме само да го продлабочиме нашето стратешко партнерство со САД. Можеби сме мала земја, но сме со многу добра геопозиција во срцето на Балканот. Можеби сме неколку километри подалеку од морето, но сме природен крстопат на неколку многу важни проекти во регионот и во Европа, генерално. Така што, мислам дека нашето стратешко партнерство со САД ќе биде од корист за сите, не само за двете земји, туку и за регионот и за Европа“, порача премиерот.
Разговорот е дел од иницијативата „Балканот напред“, а премиерот заедно со владината делегација продолжува со средби во Вашингтон, како и со учество на годинешното собрание на Обединетите нации во Њујорк.