Премиерот Христијан Мицкоски најави дека денеска во Владата ќе се одржи состанок со сите дистрибутери, трговци и маркети, на кои ќе им упати порака дека е време да ги намалат цените на производите, со посебен акцент на основните прехранбени производи.
Шефот на извршната власт потенцираше дека граѓаните досега покажале доволно толеранција и дека бизнис секторот сега е на ред да им се одолжи, додавајќи дека нема да се прифаќаат никакви изговори. Ваквата изјава премиерот ја даде во одговор на новинарско прашање по учеството на Годишниот состанок на Управниот одбор на Центарот за извонредност во финансиите (CEF).
Па, денеска имаме во во Владата состанок со сите дистрибутери, трговци и маркети и мојата порака ќе биде јасна. Завршува кризата, граѓаните беа толерантни, сега е на ред тие да им се одолжат на на граѓаните и веднаш да пристапат кон намалување на цените на на производите, посебно основните прехранбени производи. Тоа го очекувам од нив. И исто така ние како Влада имаме механизми, доколку тоа не се случи, на еден поинаков начин да го спроведеме. Оправдување и изговори не прифаќам, од типот „не ни ги качиле, не ни ги намалиле цените“ и слично. Доколку не се види реакција од страна на маркетите, дистрибутерите и производителите во следните денови, тогаш ние како Влада ќе реагираме, рече Мицкоски.
Иако премиерот не прецизираше со какви точни проценти на намалување треба да се излезе и каде тоа најмногу ќе се почувствува, тој децидно изјави дека корекција во ценовниците кај основните продукти мора да има.
Јас не би можел да кажам колкаво и каде најмногу, само кажувам дека основните прехранбени производи потребно е да претрпат корекција бидејќи граѓаните беа толерантни до сега, сега е време тие да се одолжат на на граѓаните. И ќе направиме некои споредби какви се цените во регионот, какви се цените кај нас за некои од основните прехранбени производи и во одредени маркети, ако треба, и по име и по презиме од утре јавно ќе ги објавуваме ние, па понатаму оставаме на нив, истакна премиерот.