Премиерот Христијан Мицкоски денеска ги демантираше информациите дека градоначалникот на општина Карпош, Сотир Лукровски, се повлекол од функцијата. По увидот во реновираните делови на ГОБ „8-ми Септември“, Мицкоски појасни дека станува збор за оправдано отсуство поради здравствени причини.
Тој нагласи дека општината функционира нормално и дека обврските ги презема законскиот заменик.
„Градоначалникот на општина Карпош, Сотир Лукровски, нема дадено оставка. Тој е на боледување. Во моментот во Општината има законски избран заменик-градоначалник, кој го заменува градоначалникот додека е на боледување поради одредени здравствеи проблеми“, изјави Мицкоски.
Премиерот упати остри критики до политичките опоненти кои шират шпекулации за здравјето на градоначалникот.
„Иако имаше и такви политички глодачи, кои излегуваа и се ситеа на здравствена состојба на човек, јас нема да ги коментирам тие политички глодачи. Му посакувам брзо закрепнување на градоначалникот и што побргу да се врати на својата работна позиција“, порача тој.
Во однос на дијагнозата, Мицкоски беше дециден дека нема да навлегува во приватноста.
„Повеќе детали за здравствената состојба ниту сум овластен ниту би сакал да споделам“, заклучи премиерот.