Претседателот на Владата и лидер на ВМРО-ДПМНЕ, Христијан Мицкоски, денеска изјави дека партијата ги прифаќа сите предлози на опозициските СДСМ и Левица во однос на измените на Изборниот законик, со исклучок на електронското гласање за дијаспората. Премиерот истовремено ги демантираше шпекулациите во јавноста дека планира претседателска кандидатура во 2029 година.
Мицкоски потенцираше дека по завршувањето на неговиот премиерски мандат планира да и се посвети на академската кариера.
„Прво, немам намера да се кандидирам 2029 година за претседател на државата. Кога ќе ми заврши мандатот како претседател на државата се враќам на факултет. Второ, кога зборувам за прифаќање на нивните предлози, се што ќе предложат се ќе им прифатиме, освен гласањето на дијаспората и трето, мораме сите заеднички, бидејќи сите го правевме, да се потпишеме како поднесок на истиот тој закон, изјави Мицкоски.“
Тој ја обвини партијата Левица за политичко лицемерие, посочувајќи дека нивната работна група зад сцената прифатила сè, а јавно одбива да се потпише на предлог-законот.
„Додуша нивниот главен фокус беше на финансирањето на кампањата. Се што побараа им беше прифатено. Усогласено беше со сите со кои преговараа. Впрочем, има и записници. Сега ние не можеме да зборуваме едно позади завеса, а друго да правиме пред завеса. Проблемот каде настана? Кога политичката партија рече ние нема да се потпишеме. Вие потпишете се. Ние нема да правиме филибастеринг, вие слободно гласајте го и така да помине. Со тоа каква порака испраќаат? Ние добивме тоа што сакаме. Работевме цело време најлицемерно, сега откажуваме за да се прикажеме перед оние што не поддржуваат дека еве ние сме тврдокорните, робиспјерови некои следбеници или не знам што, а во суштина како мачиња се си прифатија за време на дебатата. Тоа е таа лицемерна политика која што континуирано оваа политичка партија ја води. И еве да им олеснам, бидејќи гледам дека во јавноста шпекулираат со тоа дека јас сум предложил дијаспората да биде вклучена во гласањето, што е природно, на електронски начин од следните претседателски избори 2029 година, па јас ќе сум се кандидирал, па затоа тоа сум го предложил. Нема да се кандидирам – рече Мицкоски.“
Во однос на дијаспората, премиерот појасни дека електронското гласање е неопходно од практични причини за нашите иселеници кои имаат македонски пасоши и се наоѓаат на Избирачкиот список.
Мицкоски се осврна и на барањето за една изборна единица, нагласувајќи дека е потребен изборен праг за влез во Собранието.
„За да покажете дека сте сериозни мора да има одреден цензус којшто вие морате да го постигнете за да влезете во Парламентот. Ова не е шведска маса, па што ни чини да си прифаќаме што не ни чини да си оставаме на масата. Тоа така не функционира. Мора да сме одговорни и зрели луѓе затоа што граѓаните од нас очекуваат одговорност и зрелост, а не политикантство и детски манири да покажуваме, а се обидуваме да бидеме сериозни политичари, рече Мицкоски.“
Доколку политичките партии не постигнат конечен консензус, изборите ќе се спроведат по стариот Изборен законик, а собраниските разговори меѓу координаторите продолжуваат денеска.