Премиерот Христијан Мицкоски денеска преку социјалните мрежи информираше за своето учество на големиот Бизнис форум во Истанбул, посветен на унапредување на економската соработка меѓу Македонија и Турција.
За време на своето обраќање пред присутните бизнисмени, премиерот ги потенцираше долгогодишните врски меѓу двете држави како одлична основа за напредок.
„Денеска во работна посета на Истанбул, Република Турција, учествував на Бизнис форум посветен на бизнис соработката меѓу двете држави. Во своето обраќање истакнав дека Македонија и Турција негуваат традиционално пријателски односи изградени врз доверба, почит и силни врски меѓу народите, а токму тие односи претставуваат цврста основа за продлабочување на економската соработка и нови инвестиции“, истакна Мицкоски.
Тој пред турските инвеститори ги презентираше и предностите кои земјава ги нуди за влез на странски капитал.
Премиерот посочи дека Македонија во моментов се позиционира како стабилна дестинација со поволна инвестициска клима, модерни индустриски зони и стратешка географска положба.
Според него, ваквиот амбиент им овозможува на турските компании полесно да станат дел од европските синџири на снабдување.
Мицкоски ја заокружи својата порака со отворен повик до бизнис секторот во Турција за градење долгорочни партнерства.
„Нагласив дека нашата цел е да градиме долгорочни партнерства кои ќе создаваат нови работни места, поголем економски раст и заеднички успех. Ги поканив турските инвеститори да бидат дел од развојната приказна на Македонија, држава која има јасна визија за иднината, отворена врата за нови инвестиции и силна определба за економски развој“, соопшти премиерот.