Премиерот Христијан Мицкоски денеска се обрати на „German-Macedonian Business Summit 2026“, истакнувајќи дека партнерството со Германија е клучниот столб за градење на нова економска архитектура на државата. Тој порача дека Германија за Македонија е повеќе од економски партнер – таа е симбол на индустриска моќ и технолошки развој.
Според Мицкоски, германските инвеститори во земјава носат нови стандарди и корпоративна култура кои директно го менуваат економскиот пејзаж.
„Германските компании тука кај нас не се само инвеститори. Тие се партнери во трансформацијата на нашата македонска економија. Тие отвораат работни места, носат нови стандарди, нова корпоративна култура и технолошко знаење“, истакна премиерот.
Мицкоски нагласи дека Владата останува фокусирана на дигиталната трансформација како национален приоритет, бидејќи економскиот раст веќе не може да се темели на евтина работна сила.
„Новата економија бара паметни фабрики, автоматизација, вештачка интелигенција и постојано вложување во човечкиот капитал. Нашата визија е младите инженери и иноватори да не ја бараат иднината надвор, туку да создаваат дома“, потенцираше тој.
Премиерот вети стабилна и предвидлива про-бизнис средина, со помалку административни бариери и модерна инфраструктура за сите инвеститори.