Премиерот Христијан Мицкоски смета дека пораките на претседателката на Европската комисија, Урсула фон дер Лајен, претставуваат потврда за реформските активности на Владата и се спротивни на критиките што ги упатува домашната опозиција.
Во гостување на телевизија Алсат М, Мицкоски изјави дека оценката на Фон дер Лајен за работата на Владата ја побива тезата на опозицијата, предводена од Филипче, дека реформите не се спроведуваат.
Тој посебно ја издвои употребата на зборот „импресивна“ од страна на претседателката на Европската комисија, оценувајќи ја како значајна позитивна порака за реформските процеси во земјава.
Таа вели, вие правите импресивна работа, тоа, ќе се согласите ,претставува највисоко ниво на суперлатив и ќе се согласите дека таква реторика немаше на претходните дестинации што таа ги посети. Ние збориме за домашната политичка сцена, сега зборуваме дали оваа Влада се плаши да испорачува реформи или не се плаши. Потврдата дојде од највисокото ниво на ЕК, тоа е претседателката, која пред да дојде во Скопје, беше на неколку други места и само тука го искористи тој вординг, односно највисоко нивно на суперлатив, кога рече дека ние правиме импресивна работа во делот на реформите. Што значи, демантирани се лагите на опозицијата, ние работиме и реформираме – посочи премиерот Мицкоски.
Според Мицкоски, ваквата формулација е особено важна бидејќи, како што тврди, Фон дер Лајен не користела слична реторика при нејзините претходни посети на други земји.
Премиерот нагласи дека Владата продолжува со реформите и дека оценката од највисокото раководство на Европската комисија ја смета за потврда на нејзината работа.