Доколку поранешниот премиер Никола Груевски се врати во Македонија ќе оди во затвор. Актуелниот премиер, Мицкоски одговарајќи на новинарско прашање дали очекува негово враќање рече за Груевски има правосилна пресуда, а тој има право, како и секој еден граѓанин, да се жали.
-Јас немам никакви очекувања, но доколку Никола Груевски се појави во Македонија тој има правосилна пресуда и тој веднаш откако ќе се појави во Македонија, нормално, органите на редот ќе го обезбедат и ќе го упатат на отслужување на затворска казна којашто е согласно правосилна одлука. Ние сме Влада за којашто сите закони важат и Влада која мора да ги почитува Законите и институциите во државата. А, нормално, секое лице има право да ги користи институциите, да ги користи своите права, да користи жалби итн, итн. Но, ние како Влада имаме пред нас правосилна пресуда за којашто лицето за коешто зборувате сега е упатено на отслужување на затворска казна. А, дали ќе се врати и кога ќе се врати, јас немам такви очекувања, рече Мицкоски.
Ова доаѓа откако вчера победникот на изборите во Унгарија, Петер Маѓар, на својата прва прес-конференција рече дека во Унгарија нема место за меѓународни криминалци, пред сѐ говорејќи за азилантите од Полска, но го спомена и Груевски.