На министерската конференција за демографска отпорност што се одржува во Скопје, премиерот Христијан Мицкоски испрати директна порака до младите граѓани и дијаспората. Тој истакна дека државата мора да ја трансформира миграцијата од загуба во можност, претворајќи го „одливот на мозоци“ во „прилив на знаење“.
Мицкоски нагласи дека новата Стратегија за 2026-2046 година има за цел да создаде општество во кое младите ќе сакаат да останат и да формираат семејства.
„Младите не смеат да ја доживуваат државата како место од кое треба да заминат за да успеат, туку како место каде можат да ја реализираат својата иднина. Затоа потребни се политики што ќе овозможат подобар баланс помеѓу работата и семејниот живот, поддршка за младите родители, инвестиции во детска заштита, подобри услови за вработување и пристапно домување“, рече Мицкоски.
Тој ја критикуваше практиката на краткорочна работа во странство додека се користат услугите на домашниот систем без придонес во економијата.
„Не можеме да бараме времена работа некаде во некои туристички земји, да контрибуираме во таа локална економија неколку месеци во годината и да плаќаме таму даноци, а да бараме од нашиот здравствен систем овдека бесплатно здравствено осигурување и да живееме со критика кон тој истиот систем којшто ние истите го измачуваме и го истрошуваме“, нагласи премиерот.
Своето обраќање го заврши со апел за заедничка работа на домашниот систем, потенцирајќи дека само со силни соништа и работа дома може да се изгради отпорно општество.
„Дома се гради иднината на вашата татковина“, заклучи Мицкоски пред дипломатскиот кор и меѓународните гости.