Уставните корекции под форматите и диктатите кои во моментов се инсистираат во јавноста нема да се реализираат, порача синоќа премиерот Христијан Мицкоски. Тој подвлече дека останува отворен за дијалог на секоја адреса сè додека не се обезбеди трајно и одржливо решение кое ќе гарантира вистинска евроинтеграција, а Владата во меѓувреме целосно ќе се посвети на домашните реформи и подобрувањето на животниот стандард.
Шефот на извршната власт потенцираше дека во односите со Европската Унија мора да владеат принципи, а не двојни аршини.
Според неговите тврдења, исто како што од Македонија се бара исполнување на преземени обврски, така и Софија мора да ги почитува меѓународните норми за човекови права.
Премиерот Мицкоски јасно ја посочи асиметријата во барањата од Брисел и Софија:
„Сега од нас се бара по принципот, ние сме внатре вие сте надвор и вие сакате да дојдете внатре, да прифатиме тоа што е договорено, а од друга страна тоа што го прифатила некоја бугарска влада, во случајов почитување на човекови права, јасно е дека имаме дузина пресуди од Стразбур, од Судот за човекови права за македонската заедница во Бугарија, да се почитуваат нејзините човекови права, да се дозволи регистрирање на клубови на организации итн., тоа да не се почитува, а ние да го почитуваме“ – изјави тој.
Пристапот кон Македонија е во спротивност со европските вредности
Оценувајќи го притисокот врз Скопје како непринципиелна политика која нема никаква допирна точка со Копенхашките критериуми, премиерот подвлече дека компромисите со основните вредности го уриваат кредибилитетот.
Тој ја илустрираше состојбата преку следнава изјава:
„Ова не е шведска маса, па ова ми одговара, тоа не ми одговара, ова ќе си го земам, тоа ќе го оставам. Не, ова се принципи. Колку си играте со принципите, толку тежите како човек. Ако правите компромис со принципите тогаш кога вас ви одговара, тогаш губите на специфичната тежина како човек“ – кажа премиерот.
Крајната цел е полноправно членство, а не инстант решенија
Премиерот потсети на сите досегашни отстапки – од промената на знамето и банкнотите, сè до промената на уставното име, за кои исто така се ветуваше брз пробивачки чекор кон ЕУ, но земјата и понатаму тапша во место.
Мицкоски заклучи дека научените лекции од минатото наложуваат поимање на работите со поголема јасност:
„И секогаш беше онаа иста реторика, прозорецот е отворен, сега е моментумот, само уште ова направете го и завршено е. Како што гледате искуството не учи на потешкиот пат. Јас само се обидувам како прв човек во Владата да ги гледам работите малку појасно“ – заклучи тој.