Премиерот и лидер на ВМРО-ДПМНЕ, Христијан Мицкоски, денеска изјави дека е внатрешна работа на ДУИ и СДСМ дали ќе прават кадровски освежувања по лошите резултати на локалните избори.
Тој порача дека ВМРО-ДПМНЕ стои надвор од тие процеси.
„Тоа е нивна работа. Јас како претседател на ВМРО-ДПМНЕ имав многу надворешни замешателства и кога бевме во опозиција, и периодот после оние Локални избори во 2021 година. Јас се водам по една стара максима, која што вели, не му правим на човека тоа што не сакаш тебе да ти прават“, рече Мицкоски.
Премиерот додаде дека она што го интересира е сите подеднакво да се грижат за државата.
„Ние апсолутно стоиме надвор од тие процеси, не не интересираат, тоа си е внатрешна работа на политичките партии. Дали во ДУИ ќе има одредени кадровски освежувања и поместувања, дали во СДСМ, тоа си е нивна работа“, изјави тој.
Мицкоски испрати порака до опозициските партии дека без разлика на позицијата, треба да се грижат за иднината на државата.
„И ние без разлика, некогаш сме во Владата, некогаш во опозиција, треба да се грижиме за иднината на оваа држава, и за достоинството на граѓаните. Тоа е мојата порака, и до едната опозициска партија и до другата опозициска партија, бидејќи таму следам дека ќе има одредени структурни поместувања“, рече Мицкоски.