Собраниската дебата и процедура за Предлог-законот со кој треба да се овозможи реализацијата на проектот „Скопје – Европска престолнина на културата 2028“ привремено се става на чекање. Пратеничката група на владејачката партија одлучи денеска да го повлече предложениот текст од дневниот ред за дополнителни консултации, соопшти координаторот Никола Мицевски на прес-конференција.
Одлуката за повлекување доаѓа непосредно по забелешките упатени од опозициските пратеници за време на вонредната координација одржана во текот на самата седница.
Мицевски појасни дека целта на власта останува исполнување на проектот, но по расчистување на сите нејаснотии во текстот.
Координаторот на пратеничката група ги изнесе деталите за причините кои доведоа до одложување на гласањето:
„Согласно она што како пратеници и она што е очекување на сите граѓани, а тоа е Скопје да биде Европска престолнина за 2028 година, се направи одредено законско решение коешто денес беше поднесено од страна на пратеници. Истото беше најавено, на денешната седница, беше ставено како точка на дневен ред. По реакции од опозицијата, на вонредна координација којашто се одржа во текот на самата седница, и врз основа на заеднички разговори донесена е одлука, поради дополнителни разгледувања и поради барање на опозицијата како и надминување на одредени работи коишто им се нејасни во самото законско решение, истата да биде повлечена денеска од дневен ред, рече Мицевски.“
Според информациите пренесени од координаторот, законското решение останува во собраниските фиоки и не е целосно отфрлено.