Поранешниот прв вицепремиер и актуелен градоначалник на Чаир, Изет Меџити, кој е дел од раководството на коалицијата ВЛЕН, изјави дека генерално го поддржува протестот што в сабота во Скопје го најави лидерот на ДУИ, Али Ахмети, во знак на поддршка на поранешните команданти на ОВК кои се соочуваат со судски процес во Хаг. Коментарите ги даде во интервју за косовскиот медиум „Вокс Косова“, нагласувајќи дека протестот е демократско право, а Ослободителната војска на Косово претставува дел од националната историја и гордост.
„Во принцип, да (го поддржувам). Протестот е демократско право. Ние го сметаме протестот за демократска вредност, а ОВК е наша национална гордост“, изјави Меџити.
На прашањето дали ќе присуствува лично, тој не даде конкретен одговор, но посочи дека како градоначалник ќе овозможи протестот да се одржи на плоштадот во општината.
„Протестот ќе се одржи на плоштадот во општината каде што сум градоначалник. Ќе дадеме согласност за одржување на протестот. Се надевам дека сè ќе помине добро“, додаде Меџити.
Протестот, организиран од лидерот на ДУИ Али Ахмети, е најавен за сабота на плоштадот „Скендербег“ со почеток во 13 часот и има за цел да изрази поддршка за поранешните лидери на ОВК кои се соочуваат со обвиненија пред Судот во Хаг.