Голема полициска акција рано утрово се спроведува на територијата на цела Србија, при што се уапсени дури 26 лица за тежок финансиски криминал и корупција, соопштија од тамошното Министерство за внатрешни работи.
Операцијата е реализирана од страна на припадниците на МВР, Управата за криминалистичка полиција и Одделот за борба против корупцијата, а по наредба на Специјалните оддели од Ниш, Краљево и Нови Сад.
Од српската полиција ги соопштија деталите за синџирот на кривични дела:
„Долг список на кривични дела и милионска штета. Според нашите информации, апсењето следело по неколкумесечна оперативна работа, поради постоење основи за сомнение дека приведените лица сториле голем број тешки кривични дела за кои се гони по службена должност.“
Уапсените лица се товарат за перење пари, даночна измама со ДДВ, злоупотреба на службената положба, измама и проневера во економска дејност, како и прикривање и фалсификување документи.
Материјалната штета која му е нанесена на српскиот буџет е огромна и се мери во милиони евра.
„Ја оштетиле државата за огромна сума пари. Се сомнева дека уапсените лица со извршување на овие кривични дела стекнале противправна материјална корист во вкупен износ од 197 милиони динари. Во исто време, тие предизвикале директна материјална штета на буџетот на Република Србија и на разни правни лица од дури 200 милиони динари!“
Сите приведени лица во законскиот рок ќе бидат изведени пред надлежните обвинителства за сослушување, по што ќе се одлучува за притвор. Од полицијата порачуваат дека акцијата продолжува со полн интензитет на територијата на целата држава.