Во Кочани денеска повторно ќе се одржи „Маршот на Ангелите“, со почеток во 14:05 часот. Настанот се организира под мотото: „Со љубов, со болка и со достоинство – во име на оние кои повеќе не се тука“.
Организаторите потсетуваат дека зад секоја статистика стои човек – живот што не може да се врати и болка што не избледува.
„Нашата мисија е длабока и човечка: за нашите деца, за вистинска правда, за Македонија со совест“, истакнуваат родителите.
Тие порачуваат дека е клучно општеството да покаже дека неправдата не смее да остане незабележана и дека има луѓе кои не се откажуваат од вистината.