Најмалку 19 лица загинаа, а 16 се повредени откако две соседни четирикатни згради се срушија во текот на ноќта во градот Фес, североисточен Мароко, соопшти државната новинска агенција MAP. Инцидентот се случил во населбата Ал-Мустаќбал, каде според првичните податоци, живееле осум семејства.
Локалните власти од префектурата Фес наведоа дека уривањето се случило ненадејно и околу причините се уште се води истрага. Веднаш по пријавата, на местото пристигнале единици на локалната администрација, безбедносни служби и тимови на цивилна заштита, кои започнале итни операции за пребарување и спасување. Повредените биле префрлени во Универзитетскиот клинички центар во Фес, каде им е укажана потребната медицинска помош.
Спасувачките екипи продолжуваат да пребаруваат под урнатините со цел да утврдат дали има преживеани или дополнителни жртви. Официјалната истрага е во тек, а властите најавија дека ќе го утврдат точниот причинител на трагедијата и дали постоеле предупредувачки знаци пред уривањето.
Во Мароко, каде дел од урбаните населби се соочуваат со стареење на инфраструктурата и недоволна контрола, ваквите инциденти повторно ја отвораат темата за безбедноста на станбените објекти и потребата од системски инспекции и надзор.