Членот на Централниот комитет на ВМРО-ДПМНЕ, Валентин Манасиевски, денеска упати остри критики до СДСМ по јавниот настап на Рубин Земон, член на Извршниот одбор на социјалдемократите. Според Манасиевски, изјавите на Земон за македонскиот идентитет и Гоце Делчев се показател за тоа како партијата под раководство на Венко Филипче се однесува кон националните интереси.
Манасиевски посочи дека желбата на СДСМ за власт оди до степен на негирање на македонските обележја и прифаќање услови од земји кои го попречуваат патот кон ЕУ.
„Членот на Извршниот одбор на СДС, Рубин Земон, во јавен настап на поткаст отворено изјави дека дебатата за македонскиот идентитет не е релевантна, а Гоце Делчев го опиша како мит, тврдејќи дека не оставил никаков запис и не извојувал ниедна битка“, истакна Манасиевски.
Од ВМРО-ДПМНЕ сметаат дека Земон, како поранешен функционер, само го потврдува континуитетот на ваквите ставови во СДСМ, каде идентитетот и јазикот се користат како теми за политичко пазарење.
Манасиевски додаде дека Филипче поставува луѓе подготвени да ја релативизираат историјата и дека е подготвен на отстапки кои допираат до темелите на државноста.
„Рубин Земон е само уште еден доказ дека за Филипче не постои никаква црвена линија“, заклучи Манасиевски.