ВМРО-ДПМНЕ денеска преку соопштение и прес-конференција на Валентин Манасиевски, член на ЦК на партијата, упати низа критики до СДСМ и нивниот лидер Венко Филипче. Од партијата тврдат дека опозицијата лажно се претставува како проевропска опција.
„СДС и Венко Филипче самите си ја лепат етикетата проевропска опција, додека најдобри другари им се Онишченко, Борче Марковски и Миодраг Давидовиќ Дака, проруски бизнисмени“, се наведува во партискиот допис.
Од ВМРО-ДПМНЕ посочуваат дека лагите на СДСМ постојано се демантирани од европските институции, наведувајќи го примерот со изјавата на европратеникот Томас Вајц, како и информациите за ИПАРД средствата.
„СДС ја спинуваа неговата изјава, а тој веднаш ги демантираше и јасно посочи дека Македонија има голем напредок во Реформската агенда“, стои во соопштението.
Дополнително, партијата реагира и на изјавите на членови на раководството на СДСМ во врска со историските личности. „Додека Филипче говори за национални интереси, неговиот сопартиец и член на ИО, Рубин Земон, јавно изјави дека Гоце Делчев е небитен и дека е мит. Тоа е директно омаловажување на еден од темелите на македонската државност“, велат од ВМРО-ДПМНЕ, заклучувајќи дека денешниот СДС е ист како оној на Зоран Заев.