Членот на ЦК на ВМРО-ДПМНЕ, Валентин Манасиевски, денеска упати серија обвинувања до СДС и нивниот лидер Венко Филипче, тврдејќи дека партијата користи лажни проевропски етикети за да ги прикрие претходните национални предавства.
„СДС се претставуваат како проевропска опција, а се што ќе кажат постојано е демантирано од европски институции или од европратеници“, изјави Манасиевски.
Според него, доказ за ова се неодамнешните деманти од европратеникот Томас Вајц, како и официјалните соопштенија од Европската Комисија во врска со средствата од ИПАРД програмата. Манасиевски истакна дека додека опозицијата ширела паника, институциите на ЕУ потврдиле напредок во Реформската агенда.
Покрај меѓународниот аспект, Манасиевски се осврна и на односот кон националните херои, посочувајќи на неодамнешните изјави на Рубин Земон.
„Додека Венко Филипче говори за национални интереси, неговиот сопартиец и член на ИО, Рубин Земон јавно изјави дека Гоце Делчев е небитен и дека е мит и со тоа директно ја релативизираше неговата улога. За Филипче и СДС, еден од темелите на македонската државност е небитен“, нагласи тој.
Заклучокот на Манасиевски е дека сегашното раководство на СДС не се разликува од претходното. „СДС на чело со Венко Филипче, се истиот СДС на чело со Зоран Заев“, порача тој.