Членот на Централниот комитет на ВМРО-ДПМНЕ, Валентин Манасиевски, денеска упати обвинувања до Венко Филипче и СДС дека користат европска реторика како параван за национални предавства и одржување на проруски бизнис врски.
Според Манасиевски, лидерот на СДС, Филипче, заедно со неговиот ментор Зоран Заев, го трасирале патот до ЕУ преку обезличување на државата.
„Затоа Филипче вели дека немаат проблем да потпишуваат сѐ – уште веднаш, и да прават секакви отстапки, без притоа да има било каква гаранција за Македонија. Истовремено, СДС и Венко Филипче се претставуваат како проевропски и зборуваат за европски вредности, а одржуваат проруски врски“, изјави Манасиевски.
Тој потсети на неколку случаи кои според партијата се доказ за овие тврдења, меѓу кои и македонското државјанство за Александар Онишченко, човек кој во Украина бил гонет за корупција и перење пари.
Како дополнителен пример за „бизнис шемите“ на претходната власт, Манасиевски го посочи и случајот со почесниот конзул на Белорусија, Борче Марковски.
„Тој благодарение на Заев и Филипче доби 77 државни тендери од кои 66 беа од ЕСМ во вредност од 141 милион евра“, нагласи Манасиевски.
На крајот од своето обраќање, Манасиевски ги спомена и бизнисите со Миодраг Давидовиќ Дака во Тетово, заклучувајќи дека обидот за ребрендирање на СДС како проевропска партија нема да ги избрише сеќавањата на граѓаните за нивното минато делување.