Членот на Централниот комитет на ВМРО-ДПМНЕ, Валентин Манасиевски, на денешната прес-конференција обвини дека раководството на СДС, предводено од Венко Филипче, одржува блиски врски со проруски структури додека јавно се претставува како проевропска опција.
Манасиевски потсети на периодот кога СДС беше на власт, посочувајќи дека тогаш контроверзни бизнисмени добивале државни привилегии.
„Во времето на владеењето на менторот на Филипче, Зоран Заев, овие проруски бизнисмени добиваа тендери, плацеви, па дури и државјанства само поради соработката и блискоста со Зоран Заев“, изјави Манасиевски.
Од ВМРО-ДПМНЕ тврдат дека СДС само на хартија е европски ориентирана, додека во реалноста ја злоупотребувала европската агенда за внатрепартиски цели. Како пример беше наведена употребата на европското знаменце во Собранието, за што Македонија добиваше негативни извештаи од Брисел.
Манасиевски нагласи дека ветувањата на СДС за здравството, образованието и платите останале неисполнети.
„Кога СДС и Филипче говорат за Европа, се потсетуваме на нивните ветувања за бесплатно здравство, квалитетно образование и повисоки плати. А од сето ова добивме фотографија од авион на чиј лет ни беше ветен датумот за влез во ЕУ“, рече тој.
Според него, актуелната власт предводена од ВМРО-ДПМНЕ е единствената која на „достоинствен и чесен начин“ ќе го заврши патот кон ЕУ.