Филмска брканица се одвивала за време на изминатиот викенд на улиците во Врање, откако малолетен возач со „Опел Вектра“ бегајќи од полицијата се удрил во службено возило и повредил четири полицајци. За време на потерата, полицијата испукала истрели во воздух, а во автомобилот била пронајдена реплика на пиштол, соопшти Вишото јавно обвинителство во Врање.
Инцидентот започнал ноќта меѓу 9 и 10 октомври, кога сообраќајна патрола се обидела да го запре возилото со белградски таблички за рутинска проверка. Возачот одбил да запре и ја зголемил брзината, по што полицијата веднаш тргнала во потера. За време на бегството било забележано дека патниците фрлаат предмети низ прозорецот, а еден од нив во раката држел пиштол.
Драматичниот расплет се случил на улицата „Марка Краљевиќа“, каде полицијата поставила блокада. Малолетникот не запрел ниту тогаш, туку директно удрил во полициски автомобил. Од силниот удар, полициското возило се извртело, удрило во паркиран автомобил, а потоа и во друго службено возило.
По запирањето, полицијата утврдила дека во автомобилот се наоѓале двајца помлади малолетници, а во кабината била пронајдена пластична реплика од пиштол. Во инцидентот се повредени вкупно четири полицајци, а потврдено е и дека еден полициски службеник испукал предупредувачки проектил во воздух.
Против малолетниот возач ќе биде поднесена кривична пријава за напад врз службени лица и употреба на фалсификувани регистарски таблички. Кривични пријави ќе има и за родителите на еден од малолетниците за занемарување и злоупотреба на малолетно лице, со оглед на тоа што момчето и претходно направило сообраќаен прекршок, но тогаш имало под 14 години.
И покрај целата драма и повредените полицајци, дежурниот судија во Вишиот суд во Врање одлучил да не одреди мерка притвор за малолетниците.
Вишото јавно обвинителство дополнително побарало од началникот на Полициската управа во Врање темелно да се испитаат сите околности на инцидентот, како и оправданоста на употребените полициски овластувања за време на потерата.