За првпат беше одржан парламентарен состанок со Северноатлантскиот совет на НАТО (NAC), на кој учествуваа претставници на националните парламенти на земјите членки на Алијансата. Средбата се одржа во Брисел, во организација на Парламентарното собрание на НАТО и Алијансата, а во фокусот беа одбранбените приоритети, инвестициите и исполнувањето на преземените обврски.
На состанокот присуствуваа и пратениците од македонското Собрание Драган Ковачки, шеф на делегацијата во Парламентарното собрание на НАТО, и Павле Арсоски, претседател на Комисијата за одбрана и безбедност.
Учесниците разговарале со генералниот секретар на НАТО, Марк Руте, претседателот на Парламентарното собрание на НАТО, Маркос Перестрело, како и со претставници на раководството на Алијансата и пратеници од земјите членки.
Целта на средбата била да се зајакне соработката меѓу парламентите и НАТО во спроведувањето на договорените приоритети од самитите во Хаг во 2025 година и Анкара во 2026 година.
Во разговорите била нагласена потребата од координиран пристап кон зголемувањето на средствата за одбрана, развојот на воените капацитети, набавката на опрема и зајакнувањето на отпорноста на сојузничките држави.
Претставниците на Алијансата истакнале дека одбранбената подготвеност зависи од единството меѓу сојузниците, континуираните инвестиции и навременото обезбедување на потребните капацитети. Посебно внимание било посветено на трансатлантската соработка и на зголемувањето на придонесот на европските членки во конвенционалната одбрана.
Една од темите била и примената на обврската преземена на Самитот во Хаг за издвојување 5 проценти од БДП за одбраната и поврзаните безбедносни потреби. Биле разменети искуства за начините на кои националните парламенти можат да придонесат кон исполнување на овие цели и обезбедување долгорочна политичка и финансиска поддршка за НАТО.
На состанокот се разговарало и за можностите за продлабочување на соработката меѓу парламентарните комисии за одбрана, Парламентарното собрание на НАТО и Северноатлантскиот совет.
Како што информираат од Собранието, парламентарната дипломатија има важна улога во јакнењето на трансатлантските односи и претворањето на заедничките одбранбени обврски во конкретни национални политики и планови.