Жена, државјанка на Северна Македонија, е уапсена во Црна Гора откако со автомобил прегазила куче во населба во Улцињ.
Според информациите на црногорските медиуми, по инцидентот таа се обидела да ја напушти државата, но била запрена и приведена на граничен премин.
Како што пренесува РТЦГ, полицијата во Улцињ околу 16:00 часот добила пријава за прегазено куче.
Набргу потоа возилото било пронајдено, а возачката била идентификувана и спроведена во просториите на Одделението за безбедност во Улцињ.
Во меѓувреме, на социјалните мрежи се појави вознемирувачко видео од настанот.
Според неофицијални информации, зад автомобилот се забележува и уште едно мртво куче.
Црногорските медиуми наведуваат дека станува збор за куче сопственост на уапсената жена, кое претходно било усмртено од шарпланинец.
Од невладината организација „Пријатели на животните“ побараа итна реакција од надлежните институции и кривично гонење на сторителот, со барање за примена на најстрогите санкции согласно Законот за благосостојба и заштита на животните.
Надлежните институции во Црна Гора го истражуваат случајот, а засега не се соопштени дополнителни официјални детали за сите околности под кои се случил инцидентот.