1622 набљудувачи ќе го следат вториот круг од локалните избори, меѓу нив 651 меѓународен и 14 странски новинари
Вкупно 1622 набљудувачи, од кои 957 домашни и 651 меѓународен, ќе го следат вториот круг од локалните избори 2025, соопшти Државната изборна комисија (ДИК). На изборниот ден се акредитирани и 14 странски новинари.
Според податоците објавени на веб-страницата на ДИК, најголем број домашни набљудувачи има Здружението за развој на општествено-социјални иновации „ВАКЕ УП“ од Скопје, кое е присутно со 685 набљудувачи.
Меѓу акредитираните организации за домашно набљудување се и: МКЦ-Битола со 23 набљудувачи, ЛАГ Агро Лидер-Кривогаштани со петмина, Интерактив Битола со осум, Ромалитико-Скопје со 10, Здружение за општествен развој „За Тетово“ со пет, Национален совет за родова рамноправност со 25, ПСК „КАБ Струга“ со 16, Евротинк – Центар за европски стратегии со четворица, ЦИВИЛ – Центар за слобода со 60 набљудувачи, Три Си Консалтинг со шест, Институт за економски стратегии и меѓународни односи – Охрид со 27, како и повеќе други здруженија и иницијативи.
Најголем дел од меѓународните набљудувачи се од ОДИХР – Канцеларијата за демократски институции и човекови права, со 500 акредитирани претставници.
Следуваат: Амбасадата на САД во Скопје со 30 набљудувачи, Советот на Европа со 24, Европскиот парламент со 18, Британската амбасада со 11, како и претставници од Хрватска, Унгарија, Грузија, Украина, Франција, Холандија, Турција, Швајцарија, Албанија, Косово, Молдавија и други земји.
Изборниот процес ќе го следат и 14 странски новинари — шест од ТВ Клан Косово, еден од Топ Канал Албанија, двајца од ТВ1 Косово, еден од Европската прес агенција, двајца од ТРТ и двајца од РТКосово.