Министерката за енергетика, рударство и минерални суровини, Сања Божиновска, попладнево во Солун, во рамки на 10. Форум за енергетика на Југоисточна Европа (SEEF), го потпиша Меморандумот за соработка со кој Македонија и официјално се приклучи кон Вертикалниот гасен коридор.
Како што истакна Божиновска пред потпишувањето, овој коридор претставува нова безбедносна, економска и геостратешка архитектура за регионот.
– Денес сум исклучително горда да истакнам дека, по интензивни дипломатски напори, Северна Македонија официјално се приклучува кон Вертикалниот гасен коридор. Ова е историски момент преку кој, по цели три децении, ја прекинуваме нашата целосна зависност од една гасна рута, рече министерката.
Божиновска информира дека интерконекторот со Грција се очекува да биде оперативен во 2027 година, со почетен капацитет од 1,4 милијарди кубни метри природен гас годишно и можност за зголемување до 2,8 милијарди кубни метри.
– Визијата на Македонија не застанува тука. Веднаш продолжуваме со следниот чекор – планираниот 23-километарски интерконектор со Србија. Преку овој проект, Северна Македонија стреми да стане клучен енергетски транзитен центар што го поврзува југот со Централна и Источна Европа, посочи Божиновска.
За време на панелот на форумот SEEF, каде учествуваа и министри од Грција, Бугарија и Кипар, таа детално го објасни напредокот на теренските активности:
– Поголемиот дел од административната работа за интерконекторот со Грција е завршен, цевките се таму, сѐ околу земјиштето е веќе во процес на обработка, така што сме на вистинскиот пат. Имаме 68 километри и напредуваме како што треба. Следниот јуни е очекуваниот датум кога ова треба да биде завршено. Со Србија минатата недела го потпишавме договорот — тоа се само 23 километри, но сепак има уште долг пат бидејќи дури сега почнуваме. Тоа значи крајот на следната година, почетокот на 2028 година, односно во 2028 година сѐ ќе биде подготвено од Грција до Србија, рече Божиновска.
Покрај учеството на SEEF, министерката претпладнето говореше и на панел во рамки на 6. Метрополитен самит. На настаните учествуваа претставници на големи енергетски компании, меѓународни институции, експерти и инвеститори.