Министерството за внатрешни работи и Сојузната полиција на Комонвелтот на Австралија го зајакнаа билатералниот дијалог и професионалната соработка со потпишување на Меморандум за разбирање за борба против транснационалниот криминал и за развивање на полициска соработка.
Меморандумот има за цел зајакнување на билатералната соработка преку споделување информации, спроведување координирани полициски операции, како и преку соработка во областа на градење капацитети и професионален развој. Посебен акцент се става на справување со сложените форми на транснационален криминал, вклучително и тероризмот, нелегалната трговија со дрога, трговијата со луѓе, кибер криминалот, перењето пари, транснационалниот економски криминал, недозволената трговија со оружје и други приоритетни криминални закани од заемен интерес.
Меморандумот е договорен со цел да ја продлабочи соработката помеѓу двете полициски служби, со почитување на националните законодавства и меѓународните обврски на двете држави. Истиот претставува значаен чекор кон зајакнување на институционалните врски, ефективно справување со сложените форми на криминал и обезбедување повисоко ниво на безбедност за граѓаните на двете земји.
Меморандумот се надоврзува на претходните форми на соработка и поттикнува уште поинтензивен дијалог и размена на искуства меѓу министерството за внатрешни работи и Сојузната полиција на Комонвелтот на Австралија.