Македонија се наоѓа на првото место во Европа по бројот на заболени од западнонилска треска во однос на бројот на жители, пред земји како Италија, Грција и Романија, изјави денеска на прес-конференција Рената Младеновска, членка на Извршниот одбор на СДСМ.
Според неа, до 1 септември во земјава се регистрирани вкупно 56 случаи на западнонилска треска, а седум лица починаа, при што ги обвини премиерот Христијан Мицкоски и директорот на ФЗО, Сашо Клековски, за лошо менаџирање со здравствената криза.
„Не се ова статичките бројки, човечки животи се загубени. Повторно, исто како и со здравствената криза со водата во Гостивар, институциите на Микоцски и Клековски задоцнија со реакцијата. Владата нема капацитет да превенира и навреме да го заштити здравјето на граѓаните, туку реагира дури откако кризата ќе ескалира. Дури ниту прскањето против комарци не беше спроведено навреме“, истакна Младеновска.
Од СДСМ посочуваат дека системот за превенција, заштита и контрола на вектор-преносливите болести не функционира, а реакцијата на властите изостанала и покрај нивните претходни предупредувања.
„Кога СДСМ бараше системски мерки, Национален штаб, ентомолошкиот мониторинг, национална карта на ризик, власта не игнорираше. Мицкоски и Клековски заминаа на екскурзија кога одговорот на државата требаше да биде најсилен“, рече Младеновска.
Таа направи паралела и со ситуацијата во Гостивар, каде што околу 5.000 граѓани побараа лекарска помош поради проблемите со водата за пиење, нагласувајќи дека јавноста сè уште чека соодветен извештај и одговорност.
„Со западнонилската треска повторно гледаме задоцнета реакција откако бројот на заболени и починати веќе порасна. Истиот модел, истиот институционален хаос. Задачата на институциите е да превенираат, да контролираат, навреме да реагираат за да го заштитат населението“, порачаа од опозициската партија.
Од СДСМ заклучија дека кога превенцијата доцни и институциите молчат, цената ја плаќаат граѓаните со своето здравје и животи, поради што бараат институционална одговорност.