Трагедија ја потресе Македонија кога 14-годишно девојче почина по пад од лулашка во Гостивар.
МВР информираше дека на 9 јули во 20:20 часот од Медицинскиот центар Гостивар било пријавено дека во болницата без знаци на живот била донесена Ш.Н. (14). Таа претходно паднала од лулашка во парк во Гостивар, по што била итно пренесена во Медицинскиот центар. И покрај напорите на лекарите, во 20:55 часот дежурен лекар констатирал смрт.
Мајката на младата Назире, Зуфа Шерифи, во видео обраќање за Рома Прес, скршена од болка вели дека бара правда, бидејќи според неа девојчето од таа лулашка не може сама да падне и да почине.
-„Таа беше мојата месечина… Тој ден отидоа со внучето и девојчето на девер ми кај лулките. Си купиле кифли, ми се јави, и и кажав да не седи многу. Ми рече добро, ми мавна со рака и ми кажа – Чао мамо. По некое време се јави девојчето на девер ми, да земам здравствена книшка и со такси да одам во болница, бидејќи ќерка ми била цела со крв. Кога дојдов и ја видов Назире, знаев дека девојчето ми починало”, вели жената за Рома Прес.
Младата Назире
– „Таа лулка треба голем човек да ја лула, за да се случи тоа! Барам да се најде човекот”, раскажува за Рома Прес Зуфа Шерифи.
Вели дека таа веќе била во полиција.
-„Бев во полиција, ми рекоа дека треба да се проверат камерите. Што побргу нека се проверат, ја бараме вистината, полно камери има околу лулките! Дали се земени отпечатоци од прсти? Се извршил увид на местото, имало многу крв, а не ги зеле забите, четири заби од таму ми ги донесоа соседите. Не барам ништо, никаква отштета, само да се најде кој ја лулал и да оди доживотно во затвор! Го барам човекот и се молам што побргу да се најде! Ми ја зеде мојата месечина, мојата ѕвезда”, вели мајката.
Обвинителството по несреќата веднаш почна со итна проверка на безбедноста и начинот на одржување на сите детски реквизити во гостиварскиот парк, како и сослушување на сведоци.
-„Јавен обвинител од Основното јавно обвинителство Гостивар изврши увид на лице место. Дадена е наредба за обдукција, како и насоки да се преземат повеќе дејствија за испитување на евентуални сведоци и проверки по однос на статусот, безбедноста и одржувањето на реквизитите поставени на игралиштето“, соопштија од Обвинителството по трагедијата.