Германија е во шок по трагичната смрт на девојче помладо од две години, кое починало откако со часови останало затворено во паркиран автомобил на високи температури.
Несреќниот настан се случил во градот Шорндорф, кој се наоѓа во непосредна близина на Штутгарт.
Според првичните информации од истрагата, 44-годишна жена наводно ја заборавила својата околу 20-месечна ќерка во возилото, каде детето останало изложено на екстремна топлина во текот на денот.
Полициските информации покажуваат дека мајката се вратила до возилото на паркингот пред една хала нешто пред 15:00 часот. Кога го пронашла детето во безживотна состојба, таа веднаш побарала помош.
На местото брзо пристигнале екипи на итната медицинска помош и спасувачките служби кои започнале со реанимација, но и покрај сите напори на лекарите, детето било прогласено за починато на самото место.
Во моментот кога девојчето било оставено во возилото, надворешната температура изнесувала околу 28 степени Целзиусови во сенка.
По наредба на обвинителството, против 44-годишната жена веќе е отворена истрага, а наложена е и обдукција која треба да ја утврди точната причина за смртта.
Истрагата во следниот период треба прецизно да утврди колку точно долго детето било во автомобилот и каде се наоѓала мајката во тој период.
На терен, покрај полициските служби кои собирале докази, биле ангажирани и тимови на Германскиот Црвен крст, како и служби за психолошка поддршка поради тежината на случајот.