Намалената видливост во скопската котлина денеска предизвика пореметување во авиосообраќајот на Меѓународниот аеродром Скопје, каде што дел од летовите се реализираат со задоцнување, а еден е целосно откажан. Според најновите податоци од аеродромот, временските услови влијаат и на слетувањата и на полетувањата.
Во делот на пристигнувањата, најголемо доцнење има летот на „Пегасус“ од Истанбул (Сабиха Гокчен), кој наместо во 09:55, се очекува да слета со час и половина задоцнување, односно во 11:25 часот. Со половина час доцнење се очекува и летот на „Виз Ер“ од Дортмунд. Уште полоша е ситуацијата со летот на компанијата „АЏет“ (AJet), исто така од Истанбул, кој според распоредот требаше да пристигне на пладне, но е откажан. Летовите од Нирнберг, Фридрихсхафен и Виена засега се реализираат според потврдениот распоред.
Доцнења се регистрирани и кај заминувањата од Скопје. Летот на „Виз Ер“ за Париз (Бове), планиран за 12:25, е одложен за 35 минути и ќе полета во 13:00 часот. Значително доцнење има и летот на „Туркиш Ерлајнс“ за Истанбул, кој наместо во 13:00 часот, е пролонгиран за еден час и 20 минути и се очекува да полета во 14:20 часот. Од аеродромот препорачуваат патниците редовно да го следат официјалниот веб-сајт за најнови информации, иако се очекува временските услови да не предизвикаат посериозни проблеми во текот на денот.