Триесет и едногодишна жена по име Лидија заврши на болничко лекување во Чељабинската област во Русија, откако била касната од пајак за кој тврди дека е црна вдовица.
Инцидентот се случил за време на прошетка со нејзината ќерка на околу 20 километри надвор од градот, кога почувствувала ненадејна и силна болка под раката. Според нејзиното сведоштво, на телото забележала црно-црвен пајак со специфичен изглед, кој веднаш го истресла.
Неколку минути по каснувањето, нејзината здравствена состојба брзо се влошила, проследена со силна слабост, вртоглавица, тешкотии при дишењето и сувост во устата.
По пристигнувањето во најблиската здравствена установа, медицинскиот персонал ѝ одредил хоспитализација и соодветна терапија со инфузии и инјекции, но не можел веднаш да го потврди точниот вид на инсектот.
Лекарските тимови се консултирале и со главниот епидемиолог на регионот, кој посочил дека овој вид отровен пајак досега не е официјално регистриран на територијата на Чељабинската област. Во тек се дополнителни анализи за да се утврди дали станува збор за црна вдовица или за друг вид инсект.
Во меѓувреме, локалните медиуми потсетуваат на предупредувањата за можно ширење на овој вид низ одредени региони во Русија, каде досега се пријавени најмалку 14 случаи на каснувања.
Случај на каснување од црна вдовица неодамна беше регистриран и во Северна Македонија.