Во следните неколку години Македонија треба да врати близу 8 милијарди евра преземени финансиски обврски во периодот кога на власт беа СДСМ и ДУИ, изјави на денешната прес-конференција Биљана Кузманоска, пратеник од редовите на ВМРО-ДПМНЕ.
Кузманоска истакна дека долговите што доаѓаат за наплата не се создадени од сегашното парламентарно мнозинство, туку се наследство од претходното раководство.
„Само оваа година се враќаат околу 1,5 милијарди евра. Во 2027 година треба да се вратат уште 1,5 милијарди евра, во 2028 година околу 1,9 милијарди, во 2029 година околу 1,3 милијарди, а во 2030 година уште 1,4 милијарди евра. Тоа се близу 8 милијарди евра, долгови кои ги остави СДС, а не знаеме на што ги потрошија. Не може седум години да управувате со државата, да ја задолжувате и да преземате финансиски обврски, а потоа од опозиција да се однесувате дека долгот го направил некој друг“, рече Кузманоска.
Таа ги спореди сегашните економски показатели со оние од јуни 2024 година, нагласувајќи дека јавниот долг бележи намалување како процент од бруто-домашниот производ (БДП).
„Кога Владата предводена од ВМРО-ДПМНЕ ја презеде одговорноста во јуни 2024 година, јавниот долг беше над 60 проценти од БДП. Денес јавниот долг изнесува 58,8 проценти од БДП. Од една страна ги враќаме долговите што сме ги наследиле, а од друга страна јавниот долг како процент од БДП е понизок од нивото што го затекнавме. Паралелно, македонската економија денес бележи раст од 4,3 проценти“, додаде пратеничката.
Кузманоска ја заврши прес-конференцијата со упатување прашања до опозицијата за трошењето на јавните средства.
„Кога СДС следниот пат ќе зборува за јавниот долг, нека одговори за што ја задолжија државата 4,5 милијарди евра за само 7 години? За јахта, стан во Дубаи или пак акции во индиска авиокомпанија? Не сме исти. Разликата е евидентна“, заклучи Кузманоска.