Во тек е јавниот повик на Владата за „Поддршка за креирање на нови работни места“, кој е насочен кон македонските компании кои сакаат да го прошират и развијат бизнисот, преку отворање нови работни места. Првата подмерка од овој повик е „Вработување и раст на правни субјекти“ преку која финансиски ќе се поддржат компании за вработување на вкупно 1385 лица со по 160.000 до 250.000 денари од работно место, се вели во соопштението од ВМРО-ДПМНЕ.
-Вкупниот буџет за оваа финансиска поддршка за креирање на нови работни места изнесува 332.650.000 денари или околу 5,4 милиони евра, а една компанија може да добие поддршка за вработување на најмногу 5 лица. Финансиската поддршка варира согласно категоријата, каде што најголем износ се доделува за вработување на млади до 29 години, и тоа 250.000 денари по лице.За лица корисници на гарантирана минимална помош, Роми, лица со попреченост, жени, долгорочно невработени лица и за жени Ромки со завршено средно или високо образование, висината на грантот изнесува 220.000 денари. За невработени над 29 години висината на грантот за вработено едно лице изнесува 160.000 денари, стои во соопштението.
Новина во оваа мерка е тоа што се третираат повратниците, со тоа што за секое вработено лице повратник, на работодавачот, во зависност од дефинираните износи на соодветна категорија на невработени лица, му се исплаќаат дополнителни 10% од вкупниот износ на одобрени средства.
-Со ваквите мерки и политики, Владата предводена од ВМРО-ДПМНЕ креира можности, професионален и кариерен развој за сите македонски граѓани од сите возрасти и категории и создава поволна економска клима за развој на македонското стопанство, вели ВМРО-ДПМНЕ.