СДСМ остро ја критикува Владата предводена од ВМРО-ДПМНЕ и министерката за образование Весна Јаневска поради, како што велат, целосен колапс во испораката на учебници за учениците во новата учебна година.
Портпаролката на СДСМ, Богданка Кузеска, посочи дека илјадници ученици низ државата се принудени да учат без учебници, а оние кои ги имаат, добиле стари, оштетени и неупотребливи материјали. Според СДСМ, родителите не треба да бидат принудени да печатат учебници дома, ниту наставниците да импровизираат на своја рака.
„Наместо да преземе одговорност, Весна Јаневска прво ветуваше дека проблемот ќе го решава со донации, а потоа се повлече и изјави дека учебниците се достапни во PDF формат на интернет. Тоа не е решение, туку бегање од одговорност“, изјави Кузеска.
СДСМ бара Министерството за образование итно да обезбеди учебници за сите ученици и да преземе одговорност за, како што велат, оваа срамна ситуација која го загрозува квалитетот на образованието во земјата.
Дополнително, СДСМ ја обвинува власта за расипничко трошење на јавните пари, додека граѓаните се борат со економска криза и енормно зголемени трошоци за живот.
„Додека учениците немаат учебници, Службата за општи и заеднички работи на Владата троши 180.000 евра за апетисани – бадеми, лешници, ф’стаци и индиски ореви. После луксузот со манго, папаја и бејби биф, ова е уште еден доказ за расипништвото на владата на ВМРО-ДПМНЕ“, посочи Кузеска.
СДСМ порачува дека ова не е само политичко прашање, туку директно влијае на иднината на децата и целиот образовен систем. Партијата бара итна реакција и преземање одговорност од страна на министерската Јаневска и владата на Христијан Мицкоски.