Руските сили рано утрово извршија разорен напад со балистички ракети врз украинската престолнина Киев, при што животот го загубија две лица, а три се повредени. Остатоци од соборените проектили паднаа во повеќе градски населби, предизвикувајќи материјална штета и паника меѓу жителите, соопшти градоначалникот Виталиј Кличко.
Градоначалникот Кличко преку апликацијата „Телеграм“ информираше дека една од жртвите била пронајдена на паркинг во непосредна близина на породилиште, додека сите тројца повредени се членови на медицинскиот персонал. Во нападот е оштетен дел од фасадата на самата болница, како и една блиска клиника.
Остатоци од ракетите паднале во три различни градски населби, а Кличко потврди дека е уништен и дел од станбен објект.
„Во Днипровската област остатоци паднаа во дворот на приватна куќа“, напиша Кличко, додавајќи: „Можно е луѓе да се затрупани под урнатините.“
Тој упати итен апел до сите жители да останат во засолништата сè додека трае опасноста од нови напади.
Очевидци сведочат дека по полноќ по локално време во градот се слушнале неколку силни експлозии. На неформалните канали на „Телеграм“ беа објавени вознемирувачки снимки опишани како „пожар што го осветлува хоризонтот“.
Овој напад доаѓа само еден ден откако руските сили извршија серија продолжени напади врз цели низ цела Украина, во кои, според досегашните податоци, животот го загубија уште две лица, а 45 беа повредени.