Драган Ковачки, член на ИК на ВМРО-ДПМНЕ, имаше свое обраќање на денешниот народен митинг во општина Градско во рамки на изборната кампања 2025 година со слоган ,,Вистинскиот избор! Твојот човек! Твоето место! За твојата иднина!“, за претстојните локални избори. Ковачки се осврна на поддршката која Владата предводена од ВМРО-ДПМНЕ им ја дава на локалните единици, меѓу кои е и општина Градско, и според него, благодарение на тоа партнерство, Градско ќе се развива во модерна општина.
,,Денес сме собрани овде со заедничка цел да покажеме дека Градско не само што оди напред, туку и забрзано чекори кон подобра, посветла и поуспешна иднина. Продолжуваме со промените. Оваа мала општина, со големо срце и уште поголем потенцијал, денес е пример за тоа што може да се постигне кога се има визија, кога се работи и кога има единство. Градско е пример за заедништво, за труд и резултати“, рече Ковачки.
Ковачки се осврна на кандидатот за градоначалник на општина Градско од редовите на ВМРО-ДПМНЕ и истакна дека тој е човек кој е на терен помеѓу граѓаните, и кој е секогаш подготвен да делува во интерес на граѓаните.
,, Тој не е градоначалник што управува од далечина тој е на терен, со вас, со вашите радости и предизвици, секогаш подготвен да слушне и да делува. Тука е и во добро и во лошо“, кажа Ковачки.
Ковачки истакна дека зад сите постигнувања стои и силната поддршка од Владата предводена од ВМРО-ДПМНЕ, која ја врати довербата во локалните единици. Според него, партнерството помеѓу општина Градско и Владата ќе овозможи да се реазлизираат проекти кои ќе го сменат ликот на општината.
,,Ниту еден успех не доаѓа сам. Зад овие постигнувања стои и силната поддршка од Владата на Република Македонија, предводена од премиерот Христијан Мицкоски. Оваа Влада покажа дека општините не се само административни единици, туку живи заедници со свои потреби. Премиерот Мицкоски ја врати довербата во локалната самоуправа, обезбедувајќи поддршка за градоначалниците кои работат и создаваат“, истакна Ковачки и додаде:
,,Благодарение на ова партнерство, во Градско дополнително ќе се реализираат проекти што ќе ја менуваат сликата на општината. Од подобрување на инфраструктурата, преку поддршка на земјоделието, до инвестиции во локалниот развој и овој резултат ќе биде плод на заедничката работа меѓу градоначалникот, советот и Владата. Значи, за да продолжиме со ова темпо, потребна ни е стабилност, единство и тим кој гледа во иста насока“.