Претседателот на Уставниот суд, Дарко Костадиновски, упати итен апел до Собранието и Судскиот совет да се пополни испразнетото судиско место, предупредувајќи дека некомплетниот состав веќе предизвикува сериозни проблеми во одлучувањето. На годишната прес-конференција, тој откри дека од мај до денес, Судот има десетина предмети за кои не може да се донесе одлука поради немање мнозинство.
Меѓу закочените предмети е и оној за пензиите, за кој Костадиновски појасни дека одлуката ќе биде донесена веднаш штом се избере деветтиот судија. Тој исто така упати остра порака до политичарите за поголема уставно-правна култура и воздржаност од етикетирања.
За следната година, Костадиновски најави дека Уставниот суд ќе воведе „уставна дисциплина“ за законодавната и извршната власт, кои често не ги почитуваат роковите.
„Веќе имаме проблеми. На вчерашната седница имавме не еден, три предмети во кои немавме мнозинство. Значи од заминувањето на колешката во мај месец, до денес мислам дека имаме десетина предмети кадешто немаме одлука. И повторно, неблагодарно е да ги квалификувам како важни или помалку важни. Сите наши одлуки се важни“, изјави Костадиновски.