Денешниот ден е посебен и за Албанија и за ЕУ, бидејќи покажува дека понудата на Унијата дава резултати, изјави еврокомесарката Марта Кос по одржувањето на седмата Меѓувладина конференција, на која беа отворени преговорите по последниот, Кластер 5.
Овој кластер се однесува на „Ресурси, земјоделство и кохезија“.
„Овој успех не би бил можен без цврста политичка посветеност на Албанија и со силен ангажман на сите земји членки на ЕУ за поддршка на албанскиот напредок. Ние сме посветени на вклучување на Албанија во Европската Унија“, рече Кос.
Според неа, Албанија е најдобар пример за трансформативната моќ на проширувањето.
„Таа е инспирација за многумина на Западниот Балкан и за многу граѓани кои би сакале да ја видат истата решителност и промени во нивните земји“, додаде Кос.
Таа нагласи дека вистинската награда е затворањето на кластерите, за што треба да продолжат реформите во правосудството, борбата против корупцијата и слободата на медиумите.
Албанскиот премиер Еди Рама истакна дека отворањето на последниот кластер до неодамна изгледаше невозможно, но е остварено со жестока борба.
„Патот низ кој поминавме ни покажаа нешто многу важно. Никогаш не земајте ништо здраво за готово во Брисел. Дури кога овде се насмевнуваат, не го земајте тоа здраво за готово, затоа што насмевката може за миг да исчезне од нивните лица. Затоа продолжете и работете напорно и одговорете во секоја околност со понизност и со резултати“, рече Рама.
Тој додаде дека Албанија ќе продолжи да работи според планот за завршување на преговорите во текот на 2027 година.