Унијата на млади сили (УМС) на ВМРО-ДПМНЕ доби нов состав на Извршниот комитет, соопшти на денешната прес-конференција претседателот на подмладокот, Тодор Конески.
На почетокот од обраќањето, Конески ја истакна одлуката за вработување на уште 300 приватни специјализанти во јавното здравство, оценувајќи ја како значаен чекор за младите медицински кадри.
„Одлуката за вработување на уште 300 приватни специјализанти е значаен чекор кон создавање посилно, поквалитетно и подостапно јавно здравство, но и порака дека младите лекари се потребни, вреднувани и имаат своја перспектива во Република Македонија. Со оваа мерка, до крајот на 2026 година, уште 300 млади лекари ќе добијат можност да го продолжат својот професионален пат во јавните здравствени установи“, изјави Конески.
Тој додаде дека со оваа мерка се опфатени и здравствените установи надвор од Скопје, со што се овозможува рамномерен развој на здравството низ целата држава.
Конески ги соопшти и кадровските одлуки донесени на синоќешната седница на Извршниот комитет на ВМРО-ДПМНЕ, каде што е изгласан новиот состав на раководството на УМС.
За генерален секретар е избран Дамјан Коњановски, додека за заменик генерален секретар е именуван Стојан Пандов. За потпретседатели се избрани Борис Шамбевски, Илија Ристески и Тијана Тесалоника Шишкоска, а функциите организациони секретари ќе ги вршат Антоанета Лазаревска, Денис Пановски, Иван Димитриевски и Мартин Ивановски.
За претседател на Градскиот комитет на УМС е избран Љупчо Ристески, за меѓународен секретар Луна Стефаноска, а беа избрани и 23 нови членови на Извршниот комитет.
„Нашата цел е Унијата на млади сили да биде организација која ги слуша младите, ги препознава нивните потреби и активно работи на создавање услови за нивен личен и професионален напредок. Ни претстои период на многу работа, многу активности и голема одговорност“, порача претседателот на УМС.