Епидемиолошката состојба со западнонилската треска се смирува, а преземените мерки и засилената координација меѓу Министерството за здравство, здравствените институции и општините даваат резултат, информираше денеска на прес-конференција министерот за здравство, Сашо Клековски.
тој соопшти ги основните бројки за раширеноста на вирусот и времетраењето на хоспитализацијата на оболените.
„Во земјава досега се потврдени вкупно 53 случаи на западнонилска треска. Податоците покажуваат дека просечното времетраење на болничкото лекување изнесува 14 дена, додека најкраткиот период до испис бил осум дена. Институциите континуирано ја следат состојбата, а координираното постапување на централно и на локално ниво придонесува за нејзино стабилизирање“, истакна Клековски.
За состојбата на хоспитализираните лица детали изнесе директорот на Универзитетската клиника за инфективни болести и фебрилни состојби, д-р Фадил Цана.
Тој информираше дека во моментот пет пациенти се лекуваат на одделот за интензивна нега, при што тројца од нив се екстубирани и нивната здравствена состојба е подобрена.
Според последните податоци од здравствените власти, досега вкупно 28 пациенти се излекувани и отпуштени од болничко лекување.