На Инфективната клиника во Скопје во моментов се хоспитализирани 21 пациент кои се лекуваат од нервноинвазивна форма на заболувањето, информираше министерот за здравство Сашо Клековски.
Кај 18 од хоспитализираните лица заболувањето е веќе лабораториски потврдено, додека за тројца пациенти сè уште се очекуваат резултатите од тестирањата.
„Од овие во Клиниката за инфективни болести, 25 се излекувани и отпуштени дома, пет се смртни случаи, за жал, и имаме 21 што се во моментот хоспитализирани – 18 потврдени и три се чекаат резултатите од тестовите“, изјави Клековски.
Од вкупниот број хоспитализирани пациенти, шестмина се наоѓаат на интензивно лекување.
Покрај пациентите кои се лекуваат на Инфективната клиника, еден пациент со оваа дијагноза се лекува во приватна здравствена установа.
Министерот Клековски појасни дека бројот на потврдени случаи не треба да се толкува како бројка на новозаболени лица во истиот ден, посочувајќи го вчерашното евидентирање на шест случаи.
„Вчера имавме шест нови случаи, меѓутоа тие не се нови случаи, туку се само потврдени лабораториски случаи“, нагласи министерот.
Тој додаде дека податоците постојано се менуваат во моментот на известувањето, поради што е потребно да се прави јасна разлика меѓу новозаболени и дополнително лабораториски потврдени случаи.