Тринаесетгодишното момче кое беше прободено во пределот на срцето се наоѓа во стабилна, но сѐ уште животозагрозувачка состојба, информираше денеска министерот за здравство Сашо Клековски.
„Последната информација, за жал, ми е од вчера. Стабилна, во животозагрозувачка состојба, сѐ уште. Добрата страна – кинетиката – движењето на срцето е во ред, меѓутоа, сѐ уште е во животна опасност“, одговори Клековски на новинарско прашање на денешната прес-конференција.
Прашан за ризикот од можна епидемија на морбили поради зголемениот број случаи во соседството, министерот предупреди дека опфатот од 62 отсто вакцинирани ученици е недоволен за колективен имунитет.
„Ние предупредивме на ризикот од тоа бидејќи во Косово и Бугарија веќе има зголемен број на случаи. Во основа, Институтот за јавно здравје ги спроведе сите неопходни активности за информирање, меѓутоа вие знаете дека во основа имаме, особено во некои урбани средини – силно противење на вакцинацијата. И мораме да гледаме малку поаналитички како тоа да го надминеме бидејќи нема логика во, условно кажано, помалку развиени средини да имаме многу висок степен на опфат, вклучувајќи и со помалку прифатени вакцини, како ХПВ, а од друга страна, во средините кои се најразвиени, каде што образованието е на највисок степен, да имаме најнизок степен на опфат. И тоа е предизвик со кој мораме малку поаналитички, системски да се соочиме“, рече министерот.
Во однос на терапијата за пациентите со цистична фиброза, Клековски најави проширување на опфатот за лекот „трикафта“ до крајот на месецот, со што се планира лекот да го добиваат и деца над двегодишна возраст.
„Многу набргу ќе има промени таму, ќе ги објавиме. Очекувам дека на крајот на месецот ќе има нови објавени протоколи и ќе имаме нов опфат и на возрасна група и на генетски варијации“, појасни Клековски.