Судскиот совет за оваа среда закажа седница, а на дневен ред помеѓу седумте точки е и точката за постапување по решенија на Советот за одлучување по жалби пред Врховниот суд. И покрај тоа што не е експлицитно наведено, најверојатно се работи за предметот „Телеком-Фокус нет“, за кои веќе Судскиот совет донесе одлука за разрешување на трите судијки од Апелациониот суд. Неизвесно е дали овој Судски совет ќе успее да ја потврди одлуката која ја донесе.
За судијката Наташа Савовска Димитровска и Роза Георгиева, Советот донесе одлука за разрешување додека за судијката Јетмире Ајдини Бошњаку, беше донесена одлука за парична каза, бидејќи пријавила за неправилности при носење на пресуда во предметот и соработувала во текот на постапката. Трите судијки се жалеа до Врховниот суд, по што за две од трите жалби беше одржана седница, по што предметот повторно се најде пред Републички судски совет.
Судскиот совет за овој предмет пред јавноста ги презентираше наодите и констатираше прекршувања од Апелација во процесот на постапување по жалбата на одлуката во првостепената постапка и покрај другото утврди постоење на фалсификувани записници. Исто така, надвор од Законот за парнична постапка, пресудата со која се преиначува првостепената одлука била донесена без одржување на јавна расправа.
Одлуката за овој предмет не беше преиспитуваа само од страна на Судскиот совет и на Врховниот суд. Истрага за овој предмет отвори и Основното јавно обвинителство, откако Александар Николовски, вицепремиер и министер за транспорт и врски, го испрати предметот на разгледување. Од ОЈО неколку пати потврдија дека работат во рамките на истрагата. Државата има удел од 35% во Телеком, па одлуката на Апелација има и буџетски импликации. Затоа Владата е информирана за овој случај.
Инаку одлуката на Апелација беше донесена во јули 2024 година, непосредно пред судската ферија. Со оваа одлука, за која подоцна беа констатирани низа прекршувања од страна на Судскиот совет, се пресуди Телеком да плати отштета од 4 милиони евра на фирма со еден вработен. Имено, се работи за случај стар повеќе од 20 години. Фирмата имала склучено договор со Телеком во периодот од 2001 до 2002 година, кој бил раскинат заради долг што ги имала фирмата кон Телеком. Во првостепена постапка Граѓанскиот суд во Скопје пресудил во корист на Телеком, бидејќи судот утврдил дека се работи за фирма со еден вработен која повеќе години била со блокирана сметка, а била повторно активирана непосредно по донесување на второстепената пресуда. Заради сомнежите кои постојат за овој предмет, Кривичниот суд донесе времена мерка за запирање на извршувањето.