Министерството за социјална политика, демографија и млади информира дека во тек е имплементација на ново софтверско решение со кое се врши модернизација и унапредување на процесите за обработка и исплата на правата од социјална и детска заштита во центрите за социјална работа.
Како што појаснуваат од таму, воведувањето на новиот систем донесе одредени технички пречки кои директно влијаат врз предвидените рокови за исплата на средствата до корисниците.
„Станува збор за значајна реформа чија цел е зголемување на ефикасноста, сигурноста и квалитетот на услугите што ги добиваат граѓаните. Во процесот на техничко усогласување и миграција на податоците се појавија одредени непредвидени предизвици, кои предизвикаа пролонгирање на обработката на податоците и, следствено, доцнење на исплатата на паричните права од социјална и детска заштита за неколку дена.
Сакаме да ги увериме сите корисници дека нивните права се целосно обезбедени и дека исплатата ќе биде реализирана веднаш по завршувањето на неопходните technical технички усогласувања. Надлежните служби работат интензивно на надминување на состојбата и на целосно ставање во функција на новиот систем.
Ги замолуваме граѓаните за разбирање и трпение во овој преоден период, имајќи предвид дека станува збор за процес кој долгорочно ќе овозможи побрзи, поефикасни и поквалитетни услуги за сите корисници.
Министерството останува посветено на модернизацијата на системот на социјална и детска заштита и навремено ќе ја информира јавноста за сите понатамошни активности“, се наведива во соопштението на Министерството за социјална политика.
Од надлежното министерство потенцираат дека правата на сите граѓани кои користат ваков вид помош се целосно сигурни и апелираат на трпение додека системот не профункционира со полн капацитет.
По завршувањето на миграцијата на податоците и усогласувањето на софтверот, јавноста ќе биде дополнително и навремено известена за точниот ден на реализација на исплатите.