Обилните дождови во текот на ноќта предизвикаа најголема криза во Кичево, каде состојбата наложи итна евакуација на населението. Според најновиот извештај на Центарот за управување со кризи (ЦУК), околу 100 лица морале да ги напуштат своите домови.
Најкритично било на улицата „Прилепска“, каде водата навлегла во повеќе станбени објекти. Евакуираните граѓани се привремено сместени во спортската сала „Христо Узунов“. „На евакуираните им е обезбедена храна,вода и основни потреби. На терен цела ноќ интервенираа екипи на Црвениот крст, Дирекцијата за заштита и спасување, пожарникари и комуналните претпријатија“, информираат од ЦУК.
Покрај урбаниот дел, во кичевско се излеале и реките Зајашка (кај стадионот и новото училиште) и Треска, при што е поплавено голема површина на земјоделско земјиште.