Иако Европската комисија официјално ја објави новата визна стратегија која е во полза на камионџиите, блокадите на Балканот само делумно се повлекуваат. Додека македонските превозници преку „Макам-транс“ и нивните колеги од Црна Гора од синоќа ги пропуштаат возилата, транспортерите од Србија и Босна и Херцеговина влегуваат во петтиот ден на тотална блокада.
Српските превозници, иако задоволни од понуденото решение на ЕУ, сметаат дека има уште многу нејаснотии кои треба да се прецизираат пред да се тргнат камионите од терминалите.
„Задоволни сме од стратегијата која предвидува специфични правила за подолг престој на професионалците, но сè уште има проблеми што треба да се решат“, изјави Неѓо Мандиќ, претседател на Здружението на транспортери на Србија.
Целосното решение за „визната војна“ на границите се очекува во вторник, на 3 февруари. Тогаш министрите од сите земји од Западен Балкан ќе седнат на иста маса со високи претставници на Европската комисија за конечно да ги дефинираат правилата за престојот на возачите во Шенген зоната.
Оваа информација доаѓа по интензивните телефонски разговори меѓу шефот на делегацијата на ЕУ во БиХ, Луиџи Сореца и претседателката на Советот на министри, Борјана Кришто.